»» ဒါကတော့ မင်းဆီမပို့တဲ့ စာပါ ««
ဒီရက်တွေကို ပျော်ချင်ယောင်ဆောင်ထားတဲ့ ရက်စွဲတွေလို့ အမည်ပေးထားတယ် ။ ညနေခင်းတိုင်းဟာ အလွမ်းရောင်သမ်းလို့ ။ ကိုယ့်တနေ့တာဆိုတာ နေဝင်နေထွက် မတူတဲ့အရပ်ဆီက လာမယ့်အသံလေးကို စောင့်မျှော်နေရင်းနဲ့ ကုန်ဆုံး ။ နားကြပ်လေးထဲမှာပဲ ဘဝကြီးတစ်ခုလုံး ရှိတယ်လို့ ယုံထားရတယ် ။
ကိုယ်က အဝေးကြီးလို့ပြောတော့ သွေးနီးပါတယ်လို့ မင်းပြောတယ်နော် ။ အင်းပါ ။စွယ်တော်ရွက်တွေမြင်တိုင်း ကိုယ့်မှာ မနာလိုစိတ်တွေအားကြီးနေတာ မင်းမသိစေချင်ဘူး။ မင်းကိုယ်ငွေ့နဲ့ ထွေးမှ နွေးချင်တဲ့ကိုယ့်ရဲ့စိတ်ကို မင်းမမြင်စေချင်ဘူး ။ " တောင်ပံပါရင်မင်းဆီကို " သီချင်းကို နားထောင်ပြီးတော့ တကယ်တမ်း ကိုယ့်မှာ တောင်ပံတွေမပါလို့ဆိုပြီး မောနေအောင်ငိုရတာကို မင်း မကြားစေချင်ဘူး။ မင်းမှမဟုတ်ရင် ဘယ်လို ရာသီဥတုကမှ ကိုယ့်ကို မသာယာစေဘူးဆိုတာ မင်း မတွေ့စေချင်ဘူး ။
မင်းရှိမှဖြစ်မှာ လို့ ဆိုခဲ့ပေမယ့် မင်းမရှိတော့လည်း ဖြစ်အောင်နေလိုက်ရတာပဲ ။ အစပိုင်းတော့ အခက်အခဲရှိတာပေါ့ ။ အလေ့အကျင့်ဆိုတာ လုပ်ယူရင် ရပါတယ်လို့ မင်းပြောဖူးတယ် မဟုတ်လား။ ကြည့်လေ အခုဆို မင်းမပါဘဲနဲ့ ကိုယ်တစ်ယောက်တည်း လွယ်လွယ်ကူကူ လမ်းဖြတ်ကူးနိုင်ပြီ ။ ကိုယ်လိုချင်တဲ့ စာအုပ်တွေကို မင်းအကူအညီမပါဘဲနဲ့ ရှာနိုင်ပြီ ။ နှစ်ယောက်အတူစိုက်ခဲ့တဲ့ နှင်းဆီပင်တွေလည်း ကိုယ့်ရဲ့ရေလောင်းပေါင်းသင်မှုအောက်မှာပဲ အပွင့်တွေဝေနေပြီ။ တခါတလေတော့လည်း သူတို့သာ စကားပြောတတ်ရင် မင်းကို သတိတရမေးနေကြမလားလို့ ကိုယ်က တွေးမိသေးတာ။ ထားပါ။ ကျန်တဲ့အရာတွေမှာလည်း ဒီလိုပဲ ကိုယ်အဆင်ပြေပါတယ်။
ကိုယ်က အဆင်ပြေတယ်လို့ ပြောနေရင် ပြေတယ်ပေါ့ ။ ဘာလို့ မယုံသင်္ကာနဲ့ ခဏခဏမေးနေရတာလဲ ။ ဒိုင်ယာရီစာအုပ်ရဲ့ စာမျက်နှာတွေပေါ်က ငိုနေတဲ့emoji တွေရဲ့ တစ်ရက်ပြီးတစ်ရက် ( တစ်ရွက်ပြီးတစ်ရွက် ) ကူးစက်ပျံ့ပွားနှုန်းကို ကိုယ် ဘယ်တော့မှ မင်းကို ပေးသိမှာ မဟုတ်ဖူး ။ ဟုတ်တယ်လေ ။ ကိုယ်ကတော့ ကမ္ဘာတစ်ခုလုံးနဲ့ လွဲချင်လွဲ ။ မင်းကိုတော့ ဘယ်ပျော်ရွှင်မှုနဲ့မှ မလွဲစေချင်ဘူး ။ ကိုယ်က သိပ်ပြီးအလိုမကြီးပါဘူး ။ မင်းသာ ပျော်နေမယ်ဆို ကိုယ်မပါလည်း ရတယ် ။
သတိရစိတ်ကတော့ အတွင်းသားထဲတင်မကဘူး ။ အရေပြားပေါ်ထိ တက် တက်ဖျားတယ် ။ မိုင်ထောင်သောင်းချီဝေးတဲ့အရပ်ဆီကိုငေး စိတ်မှန်းနဲ့ပျံသန်းလာတတ်တဲ့ အနမ်းတွေကို စောင့်စောင့်ပြီး ချိုတယ်လို့မှတ်ရတာပဲ။ ငိုရတာတော့ လက်တွေ့ပေါ့ ။ ရေဒီယိုကလာတဲ့ အဆွေးသီချင်းတိုင်းက ကိုယ့်ရဲ့ အမြဲတမ်းအဖော် ။ မီးဖိုဘေးမှာထိုင်ပြီး အေးနေတဲ့ကိုယ့်စိတ်တွေဟာ မင်းမရှိတာနဲ့ တိုက်ရိုက်အချိုးကျနေမလား ။ ရုပ်ရှင်တွေထဲကလို နှစ်ယောက်အတူစပြီး တစ်ယောက်တည်းဆုံးတဲ့ လမ်းတွေဟာ မင်းနဲ့ကိုယ်များ ဖြစ်နေမလား ။ မင်းနာမည်တွေ အော်ခေါ်တိုင်းသာ အဝေးကြီးဆိုတဲ့တံခါးကြီး ပွင့်သွားရင် သိပ်ကောင်းမှာပဲ။
ပြိုလဲနေတာ ကိုယ်ပါ ။ စကားလုံးတွေ မဟုတ်ဘူး ။ ဒါကို မင်းသိဖို့ မလိုဘူး ။ မင်းက မတတ်သာလို့ပါ ဆိုတဲ့ စကားလုံးကို တွင်တွင်ပြော ကိုယ်ကလည်း ရှိစေတော့ ဆိုတဲ့အပြုံးကို ရင်ထဲကမပါဘဲ နှစ်နှစ်ခြိုက်ခြိုက်သုံးလို့ ။စက္ကူနဲ့ငှက်ရုပ်လေးခေါက်မယ် ။ မင်းအပေါ်မထားခဲ့တဲ့ အတ္တနဲ့ ဘယ်ကိုမှထွက်သွားလို့မရအောင် ကိုယ့်အနားမှာပဲ သူ့ကို ချည်နှောင်ထားမယ်။ မင်းကိုတော့ ချစ်ခြင်းအားဖြင့် ရှေ့ဆက်ပြီး ဝေးပါ့မယ် ။
ပိုပိုဖီးနစ်(credit)
No comments:
Post a Comment